Home Camp der Unterstufe

Auch unsere jüngsten Helden stecken aktuell in einer Erlebniswoche. Sie haben sich in ihrem Schulzimmer einquartiert bzw. verschanzt und machen quasi ein Home Camp mit erlebnisreichen Ausflügen durch den Tag. Was sie dabei so erleben, wird täglich in der Whatsapp-Gruppe der Klassenlehrerin berichtet. Wir haben uns dort eingehackt und ein paar Bilder und Texte (nur leicht redaktionell bearbeitet) heruntergeladen.

 

Tag 1

Nachem irichte heimer zämägsteut was mer müesse ga ichoufe. Wow das git ganze längi Liste. Nächär hei üsi erste Chöch e super Lasagne gchochet. Am nami heimer riese Spass gha bim Minigolf spiele. Ize gniessemer nachemne Salatbuffet dr Abe mit de Schlümpf.


Tag 2

Mir si am Morge mit em Poschi bis Wahledorf u de ufe Chutzeturm. Dert heimer brätlet vo Cervelat bis Schoggibanane. Leider heimer ke Brunne gfunde, so simer igschmieret mit Chole, Schoggi u Banane witer richtig Frieswil gmaschiert. Eigentli wär das e Spaziergang vore Stund, aber mit au dene Chäfer u Schnägge ungerwägs heimer fasch drü Stund gha. Es paar si richtig düre! Aber luschtig heimers gha. Nachem Hamburger ischs de doch es paarne zviu gsi u itze isch d’Schlaftruppe uf 7 gschrumpft. Üsi siebe Zwärge …


Tag 3

Hüt heisi bis am achti gschlafe u de simer zersch ga dusche. Wow, es paari bringt me fasch nüme unger dr Duschi füre….
Nachem Zmorge simer de richtig Wylerbad gloffe.
Ir Badi isch d’Frou Stalder cho u mir si ga schwümme, d’Frou Kellner töichle u dr schön spielplatz gniesse.
Deheim heimer Pizza bachet u itze fiiremer pijamaparty!


Tag 4

Am Morge wieder bis am Achti schlafe u nachem Zmorge parat mache. Trotti fasse u los geits. Im Bus: heb di – nid am Trotti sondern am Bus!!! 😁 Im Zug heimer chli me Platz gha u de simer vo Gasel bis Thörishus gfahre. Isch astrengend aber cool gsi. In Thörishus heimer vo Pulfers es feins Zvieri brcho. Merci no mau. Im volle Zug bini mit ungefähr 8 Trottis im Weg gstande. Da gits tatsächlich mega viu Lüt wo eim use helfe und ou Schüeler hei vo selber chegget, dass si use müesse. Abgschlosse heimer dr Tag mit Pommes u Fischstäbli.


Tag 5

Üse letscht Tag geit am Ändi zue. Mir sitze im Tram für zrugg i d’Schuel. Nachdem mir hüt packt hei – mau luege öb dr Dehei die richtigi Dräckwösch heit 😂- simer mit Bus u Tram uf Ostermundige is Bimano gange. Deet hani doch es paar Chlättertalent entdeckt. So, itze geit die Wuche verbi.